എന്നെ ലൈക്കണേ....

Friday, June 6, 2014

ഭൗതിക ഭ്രമകല്‍പ്പനകളില്‍ ഒരൌലികബഹിര്‍സ്ഫുരണം പതിച്ച ചോദ്യം

---- ആരോടാണ് ഞാന്‍ പറയുക ----

-1-
ഭൂമിയുടെ ഉള്‍ക്കാമ്പില്‍ നിന്നും
പൊട്ടിയൊലിച്ച്,
എന്‍റെയോര്‍മ്മകളെ പൊള്ളിക്കുന്ന
ലാവാപ്രവാങ്ങളെക്കുറിച്ച്...
മന്വന്തരങ്ങളുടെ ദൈര്‍ഘ്യത പേറുന്ന
ഉഷ്ണതപസ്സില്‍
മൗനം പോലെയുറഞ്ഞു പോയ
*യമിയെ കുറിച്ച്...

....ആരോടാണ് ഞാന്‍ പറയുക...?

ആത്മാവില്‍ നിന്നുമാത്മാവിലേക്ക്
മഴവില്‍നൂലാലിഴ ചേര്‍ത്ത് കെട്ടിയ
പ്രണയപ്പാലത്തില്‍ നിന്നടര്‍ന്ന
നേരിന്‍റെ നിറവുകളെ ക്കുറിച്ച്...
നിദ്രാടനങ്ങളില്‍ തേഞ്ഞുതീര്‍ന്ന
സ്വപ്നപാദുകങ്ങളെ
തേടിത്തളര്‍ന്നു വിതുമ്പുന്ന
രാവിന്‍റെയേകാന്ത ധ്യാനങ്ങളെക്കുറിച്ച്...
ആരോടാണ്;
ആരോടാണ് ഞാന്‍ പറയുക...??

-2-
ഇവിടെപ്പൊഴിയുന്ന 
ആയുസ്സിന്‍റെ മഴത്തുള്ളികളില്‍
മരുഭൂമികള്‍ തേച്ച ഉഷ്ണജ്വരത്തിന്‍റെ 
പ്രവാസതാപങ്ങള്‍...
ഉരുകിത്തീരുവാന്‍ 
മെഴുതിരിപ്പിറവിയുടെ
ശാപജന്മപ്പുടവകള്‍ പുതച്ച
പ്രയാസ പര്‍വ്വങ്ങള്‍...
ഹൃദയങ്ങളില്‍ ഗൃഹാതുരതയുടെ
സിരാധമനികള്‍;
തലച്ചോറില്‍ ബാല്യകാലത്തിന്‍റെ
സ്മൃതി തരംഗങ്ങള്‍....!

എല്ലാം,
ഇതെല്ലാം ആരോടാണ് ഞാന്‍ പറയുക...???

-3-
ഭൂതം!
വര്‍ത്തമാനം!!
ഭാവി!!!

അവസ്ഥാന്തരങ്ങള്‍,
പ്ലാസ്മയും കടന്ന്
ഇനിയും കണ്ടെത്തപ്പെടാത്ത തലങ്ങളിലേക്ക്
വിലയിക്കപ്പെടുന്നതും........
മാനവീയങ്ങള്‍,
സ്ത്രൈണതയുടെ ഉപഭോഗസാധ്യതകളില്‍ 
കച്ചവടത്തെരുവുകളിലെ
സ്ഫടികസ്തൂപങ്ങളായ്
പരിണമിക്കപ്പെടുന്നതും........
ഇരകളും, വേട്ടക്കാരും 
കൂട് വിട്ടു കൂടുമാറി കളിക്കുന്ന
രാഷ്ട്രമീമാംസയുടെ
കളിക്കളങ്ങളില്‍,
ഇനിയുമവതരിക്കാതെ
ഒടുവിലെല്ലാമൊടുക്കുവാന്‍
അവതാരപ്പിറവി പൂകാനിരിക്കുന്ന
ഒരു വേട്ടക്കാരനെക്കുറിച്ചും 

ആരോടാണ് ഞാന്‍ പറയേണ്ടത്????


------------ശുഭം?--------

*യമി: മഹര്‍ഷി, സന്യാസി


 

6 comments:

  1. ആരോട് ചൊല്ലേണ്ടു ഈ നല്ല കവിത!

    ReplyDelete
  2. ചില ചോദ്യങ്ങള്‍ അങ്ങിനെയാണ്
    ചോദിച്ചാലും ചോദിച്ചാലും തീരില്ല ...

    നല്ല ആശംസകളോടെ
    @srus..

    ReplyDelete
  3. ചോദ്യങ്ങൾ ഒരിക്കലും തീരില്ല ഇ ആനന്ദമായ ഭൂമിയിൽ
    good poem

    ReplyDelete