എന്നെ ലൈക്കണേ....

Tuesday, May 6, 2014

ഇ-കവിതയുടെ ജാതകക്കുറിപ്പ്‌ വായിക്കുമ്പോള്‍...



സൈബര്‍ കവിതകള്‍
ആന്‍റി-വൈറസായിരിക്കണം...  
ഒരു ഹാക്കില്‍ സ്വത്വം നഷ്ടപ്പെടാതിരിക്കാന്‍
ഒരു ബേക്കപ്പ് സോഫ്റ്റ്‌വെയര്‍....!

പ്രേമം കാമത്തിന്‍റെ വാതായനമാകുന്നത്
ഓണ്‍ലൈന്‍ ചിന്തകളെ
ചുട്ടുപൊള്ളിക്കുന്നുണ്ട്...
പിഞ്ചു കുഞ്ഞിന്‍റെ രതിസംജ്ഞകള്‍
യൂ-ട്യൂബില്‍ തേടുന്ന കഴുകന്‍ കണ്ണുകളില്‍
സദാചാരം വ്യഭിചരിക്കപ്പെടുന്നു.....

ടാറുരുകിക്കറുത്ത നാട്ടുവഴികളില്‍
പൂര്‍വ്വസൂരികളുടെ പാദചിഹ്നങ്ങള്‍
മറവിയുടെ സമാധിയണിയുന്നു...
ബ്ലോഗായനങ്ങളിലേക്ക്
പലായനം ചെയ്ത കവിതകള്‍,
വൃത്തങ്ങളിലും, അലങ്കാരങ്ങളിലും,
ഉല്‍പ്രേക്ഷകളിലും,
തടവു കിടക്കുന്നേയില്ല......

കവിതകളിപ്പോള്‍
ഭാവനകളേക്കാളിപ്പുറം
യാഥാര്‍ത്യങ്ങളിലേക്ക് മാത്രം
ചേക്കേറുന്ന
ഗൂഗിളാകാശത്തിലെ
സൈബര്‍പ്പിറാവുകളാണ്...!!

 

Monday, May 5, 2014

ഞാനില്ലാത്ത മറ്റൊരു തൃശ്ശൂര്‍ പൂരം കൂടി

തൃശൂര്‍ പൂരമേ
ഞാനില്ലാതെ നീയെങ്ങിനെ ഉപചാരം ചൊല്ലിപ്പിരിയും??
ഇലഞ്ഞിത്തറ മേളത്തിന്‍റെ ആസുരദൃശ്യനാദവിസ്മയങ്ങളില്‍
കണ്ണും കാതും കുതിര്‍ന്നു പോകുന്ന പകല്‍ചൂടും
മഠത്തില്‍ വരവിന്‍റെ മാസ്മരനിമിഷങ്ങളില്‍ ആത്മാവ്പോലും അണിയുന്ന കുളിരും
കുടമാറ്റത്തിന്‍റെ അപരാഹ്നവര്‍ണ്ണക്കാഴ്ച്ചകളില്‍
കൈമെയ് മറന്നു ആര്‍ത്തുവിളിക്കുന്ന പുരുഷാരവും
രാത്രിയില്‍ തേക്കിന്‍കാടിലേക്ക് ഇറങ്ങിവരുന്ന ഉജ്ജ്വലവര്‍ണ്ണവിസ്ഫോടനങ്ങളുടെ...
നക്ഷത്രങ്ങളും
ആനയും അമ്പാരിയും
ആലക്തികപ്രഭയില്‍ കുളിച്ച
അലങ്കാരപ്പന്തലുകളും
കടലയും കരിമ്പും ചുണ്ടുചോപ്പനും പൊരിയും
ഉഴുന്നുവട മധുരസേവയും
രാഗത്തിലെ പാതിരാസിനിമയും
ഞാനില്ലാതെ എങ്ങനെ ആഘോഷിച്ചു തീരും ??

എനിക്കറിയാം,
കല്യാണം കഴിഞ്ഞാല്‍ അഴിക്കാതെ
പിന്നെയും കൊറച്ചു ദീസം
ബാക്കിവെക്കുന്ന പന്തല് പോലെ
എക്സിബിഷന്‍ അവിടെയുണ്ടാകും...
തൃശ്ശൂര്‍ പൂരമേ,
നിന്‍റെ മണവും ആ എക്സിബിഷനും
എനിക്കായി ബാക്കിവെക്കുക...
ഞാന്‍ തിരിച്ചു വരുമ്പോള്‍
എനിക്കത്;
(അതെങ്കിലും) മുകരണം .......!!
 

Sunday, May 4, 2014

രാഷ്ട്രീയം, പ്രണയം പിന്നെ ഗൃഹാതുരത്വം



ചായക്കടകളില്‍ ‍ നിന്നാണ്
രാഷ്ട്രീയത്തിന്‍റെ 
സംവാദങ്ങള്‍ക്ക് ചൂട് പിടിക്കുക...
ബാര്‍ബര്‍ ഷാപ്പുകളില്‍ ‍
ഇഴകീറി പോസ്റ്റുമോര്‍ട്ടം
നടത്തപ്പെടുന്നത് വരെ
ഓരോ തര്‍ക്കങ്ങളും
റോഡരുകുകളിലെ കലുങ്കുകളില്‍
കിങ്ങ് ബീഡി വലിച്ചിരിക്കുന്നുണ്ടാകും... !


ബസ്സ്‌സ്റ്റോപ്പുകളില്‍ നിന്നാണ്
പ്രണയത്തിന്‍റെ പുസ്തകത്തിലെ
ആദ്യതാള്‍ മറിക്കപ്പെടുക
കടല്‍ത്തീരത്തെ
അന്തിച്ചുവപ്പുള്ള ഇരുളില്‍
സ്വയമലിഞ്ഞു ചേരുന്നത് വരെ
അത് ആകാശം കാണാത്ത മയില്‍പ്പീലിയായിരിക്കും..!!


മരുഭൂമികളില്‍ നിന്നാണ്
ഗൃഹാതുരത്വത്തിന്‍റെ മഴത്തുള്ളികള്‍
നാം കണ്ടെടുക്കുന്നത്
തിരിച്ചു പോകേണ്ട
മടുപ്പിക്കുന്ന വഴികള്‍ക്ക്
കാല്‍പ്പനികതയുടെ
ഇല്ലാവര്‍ണ്ണങ്ങള്‍ തേച്ച്
നമ്മള്‍ സ്വയം നഷ്ടപ്പെടും......!!!


......ശുഭം....